ഭൂവിനിയോഗം

മലയിന്‍കീഴ് ഗ്രാമപഞ്ചായത്ത് തികച്ചും ഒരു കാര്‍ഷികഗ്രാമമാണ്. കുന്നും ചെരിവും നിരപ്പും വയലും ഇടകലര്‍ന്നതാണ് ഈ ഗ്രാമത്തിന്റെ ഭൂപ്രകൃതി. ഇവിടുത്തെ മണ്‍തരങ്ങള്‍ പൊതുവേ കൃഷിക്കനുയോജ്യമാണ്. മൂന്നു ദശാബ്ദങ്ങള്‍ക്കു മുന്‍പുണ്ടായിരുന്ന പല വിളകളും ഇടവിളകളും, ദീര്‍ഘകാലവിളകള്‍ക്കും നാണ്യവിളകള്‍ക്കുമായി വഴി മാറിയിരിക്കുന്നു. നെല്‍പാടങ്ങള്‍ പലതും തെങ്ങിന്‍തോപ്പുകളായും റബ്ബര്‍ തോട്ടങ്ങളായും മാറി. പാടങ്ങള്‍ നികത്തി പറമ്പുകളാക്കി മന്ദിരങ്ങള്‍ പണിയുന്ന പ്രവണതയാണ് കണ്ടുവരുന്നത്. മുന്‍കാലങ്ങളില്‍ സാര്‍വ്വത്രികമായി ഉണ്ടായിരുന്ന പല ഇടവിളകളും ഇന്നില്ല. മൂന്നുനാലു ദശാബ്ദങ്ങള്‍ക്കു മുന്‍പു വരെ നെല്ലും മറ്റു ധാന്യങ്ങളും കൃഷി ചെയ്തിരുന്ന പ്രദേശങ്ങള്‍ വാഴ, മരച്ചീനി തുടങ്ങിയ കൃഷികള്‍ക്കും, പറമ്പുകള്‍ തെങ്ങുകൃഷി പോലുള്ള ദീര്‍ഘകാല വിളകള്‍ക്കും നാണ്യവിളകള്‍ക്കുമായി വഴിമാറിയിരിക്കുന്നു. സാമ്പത്തികലാഭത്തിനായി മറ്റെല്ലാ കൃഷികളേയും മാറ്റിവച്ച് റബ്ബര്‍ കൃഷിക്കാണ് കര്‍ഷകര്‍ കൂടുതല്‍ പ്രാധാന്യം നല്‍കിവരുന്നത്.